~ සසංක පෙරේරා, දකුණු ආසියානු විශ්වවිද්‍යාලය, නව දිල්ලිය
Centre for Asia Pacific Aviation සංවිධානයට අනුව, ඉන්දියාවේ ප්‍රධානතම හා විශාලතම ගුවන්තොටුපළ වන නව දිල්ලියේ ඉන්දිරා ගාන්ධි ජාත්‍යන්තර ගුවන් ගුවන්තොටුපොළ මූල්‍ය වර්ෂ 2017 හා 2018 යන කාලය ඇතුළතදී මිලියන 65.7 ක ගුවන් මගීන් සංඛ්‍යාවක් සඳහා සේවා පහසුකම් සපයන ලදී. ඒ සඳහා දිනකට ගුවන් ගමන් 1, 200 කට වඩා වැඩි ප්‍රමාණයක් සඳහා සේවා සැපයීම සිදු විය. මේ නිසා මෙම ගුවන් තොටුපොළ බෙහෙවින් කාර්ය බහුල හා කාර්යක්ෂම ගුවන් තොටුපළක් ලෙස පසුගිය දස වසරක පමණ කාලය තුළ ප්‍රසිද්ධියක් ලබා තිබුණි.
එකල තිබුණු ඇස්තමේන්තුවලට අනුව, වර්ෂ 2020 වන විට ඉන්දිරා ගාන්ධි ජාත්‍යන්තර ගුවන් ගුවන්තොටුපළ ගුවන් මගීන් මිලියන 80 කට සේවා සපයනු ඇතැයි ගණන් බලා තිබුණි. එසේ සිදු වූයේ නම්, මෙම ගුවන් තොටුපොළ ලන්ඩනයේ හීත්රෝ ගුවන් තොටුපොළ අභිබවා යන තත්ත්වයක් තිබුණි.
එනමුත්, 2020 දී කෝවිඩ් 19 වසංගත තත්වය නිසා ගෝලීය වශයෙන් ගුවන් ගමන් බරපතළ ලෙස සීමා කිරීමේ තත්ත්වය තුල, ලොව අන් ගුවන්තොටුපොළවල් මෙන්ම ඉන්දිරා ගාන්ධි ජාත්‍යන්තර ගුවන් ගුවන්තොටුපොළ ද නිශේධනීය බලපෑම් ගණනාවකට ලක්විය. එනම්, ගුවන් තොටුපොළ මුළුමනින්ම වසා දැමීමේ තත්ත්වයක් මතුවීම නිසා ජාත්‍යන්තරව හා ජාතික ව සිදු වූ ගුවන් ගමන් මාස ගණනක් මුළුල්ලේ සම්පූර්ණයෙන්ම නැවතී තිබුණි. අත්‍යාවශ්‍ය භාණ්ඩ ප්‍රවාහන ගුවන් යානා සහ ලොව නොයෙකුත් තැන්වල වසංගත තත්ත්වය නිසා සිරවී සිටි ඉන්දියානුවන් නැවත තම මව් රට වෙත ගෙන ඒමේ වශ්‍යතාව සපුරා ගැනීම සඳහා ගුවන් ගත කල මානුෂීය ගුවන් ගමන් හැර, සාමාන්‍ය ගුවන් ගමන් මේ වන තෙක් මෙම ගුවන් තොටුපොලෙන් සිදු වන්නේ ඉතාමත් අවම වශයෙනි. එනම්, වෙළඳ මට්ටමෙන් ක්‍රියාත්මක වන අභ්‍යන්තරික ගුවන් සේවා අතලොස්සක් පමණක් මෙම ගුවන් තොටුපොළින් ක්‍රියාත්මක වුවද, සාමාන්‍ය ජත්‍යන්තර ගුවන් ගමන් අද වන විටත් සිදු වන්නේ නැත.
බෙහෙවින් කාර්ය කාර්ය බහුල හා අතිශයින් ආලෝකමත් වෙළඳ සංකීර්ණයක් මෙන් දිස්වූ මෙම ගුවන්තොටුපල මේ වන විට ජන ශූන්‍ය වූ හොල්මන් නගරයක් ලෙස විද්‍යමාන වේ. ගුවන්තොටුපොළේ අත්‍යාවශ්‍ය කාර්යය සඳහා සහභාගීවන නිල නිලධාරීන් කිහිපදෙනකු හැරුණු විට, ගුවන් මගීන් දැකගත හැක්කේ ඉතාමත් අඩුවෙනි. එමෙන්ම, මෙතෙක් සාමාන්‍ය සංසිද්ධියක් ලෙස දැකගත හැකි වූ කඩසාප්පු සියල්ලම පාහේ බොහෝදුරට වසා දමා ඇත. ඒවායේ සේවය කළ සේවකයින් ගේ තත්ත්වය මේ වන විට කුමන මට්ටමකට පහත වැටී ඇත්ද යන්න සිතා බැලිය යුතු කාරණයකි.
මෙහි පහත දැක්වෙන ඡායාරූප සමූහය ගනු ලැබුවේ ජූලි 8 වන දින ඉන්දිරා ගාන්ධි ජාත්‍යන්තර ගුවන් ගුවන්තොටුපොලින් කොළඹ බලා ගුවන් ගත වූ විසි දෙනෙකු පමණක් ගමන්ගත් ගුවන් ගමනට සහභාගී වීම සඳහා එහි පැමිණි විට දීය. එම ගුවන් යානය කොළඹ වෙත පැමිණියේ ශ්‍රී ලංකාවේ සිරවී සිටි ඉන්දියානු ජාතිකයන් නැවත වරක් සිය මව් රටටට ගෙන යාම සඳහාය. ඒ ඉන්දියානු රජය විසින් ගත් ජාත්‍යන්තරව ක්‍රියාත්මක කර ඇති ‘වන්දේ භාරටත්’ යන ක්‍රියාන්විතයේ කොටසක් හැටියට ය.
එසේ ශ්‍රී ලංකාව වෙත ගුවන් ගතවීමේදී මෙලෙසින්ම නව දිල්ලි නගරයේ හා ඉන්දියාවේ අන් ස්ථාන කිහිපයක කෝවිඩ් 19 වසන්ගත තත්ත්වය නිසා සිරවී සිටි ශ්‍රී ලාංකික‍යින් කිහිපදෙනෙක්ද එම ගුවන් යානය මගින් ශ්‍රී ලංකාව වෙත යැවීමට නව දිල්ලියේ ශ්‍රී ලංකා මහ කොමසාරිස් කාර්යාලය විසින් කටයුතු කර තිබුණි.
හදිසියේ ගනු ලැබූ මෙම ඡායාරූප සමූහයෙන් පෙන්වන්නේ ඉන්දිරා ගාන්ධි ජාත්‍යන්තර ගුවන් ගුවන්තොටුපළ බොහෝ දුරට ජන ශූන්‍ය වී ඇති ආකාරය මෙන්ම, විදුලි බුබුළු දල්වා ගුවන් තොටුපොළ ආලෝකමත් කර තිබුණ ද එහි ඇති කඩ සාප්පු බොහෝමයක් වසා දමා ඇති ආකාරයත්, පවතින වසංගත තත්ත්වයට මුහුණදීම සඳහා ආසන අතර ආරක්ෂිත අවකාශයක් සම්පාදනය කිරීමට ගෙන ඇති උත්සාහයන් යනාදී කරුණුත්‍ ය.
